العيكورة يكتب: طوااالي كده يا عرمان؟

الانتباهة اون لاين موقع اخباري شامل

فى اول لقاء تلفزيوني للاستاذ ياسر عرمان بعد تعينه مستشاراً سياسياً لرئيس الوزراء بدأ الرجل (بمكنة رئيس دولة) ياسر عرمان الذى لا اعلم له مؤهلاً لهذه الوظيفة سوي انه كان تاجراً وطنياً ماهراً بقضايا الهامش . سبق ان ذكرت فى مقال سابق ان السيد عرمان لن يتوقف طموحة عند المستشارية السياسية واشرنا الى عدة خطوات بدأها قبيل صدور قرارا التعيين كمناداته بالمصالحة والوفاق الوطنى حتى يبدو فى هيئة الواعظ المتبتل وقلنا ان عين عرمان (التانية) ستكون علي كرسي حمدوك نفسه فالحاضنة واحده وما يجمعهما اكبر من ما يفرقهما فالرجلين رفقاء الحزب الشيوعي وان اشيع ان حمدوك (كااان) شيوعياً قبل ان يعود مرة اخري مع بواكير التغيير .
على كل حال دعونا نتابع ابرز ما جاء فى لقاء السيد عرمان بحسب ما اورته صحيفة [متاريس] الالكترونية فعرمان قال إن شعبية حمدوك قد تراجعت بفعل ملابسات الانتقال ! ماهى تلك الاسباب او الملابسات (لم يفصل) السيد عرمان رماها كده وخلاس (ملابسات ياخي) وتحاشي ان يخوض فى اسباب هذا التراجع لقناعنه انه لن يستطيع الالمام باخفاقات ودقسات وملايين الدولارات التى دفعت للدول استرضاء للعالم الغربي وصفقات خفية ومعلنه وتعهدات و (انبراشة) و كانت النتيجة صفراً كبيراً على الشمال قبضة حمدوك ومن معه . لذا قال بسبب ملابسات الانتقال . كذلك ابدي السيد عرمان عدم رضاه عن اداء الحكومة ! بسم الله ماشاء الله الم اقل لكم ان الرجل (داخل على طمع) مستشار سياسي بمكنة (ستة سلندر) . مطالباً جميع قوي الثورة بالالتفات للعمل و ازالة العقبات التى تسهل الاداء التنفيذي لحلحلة القضايا التي خرج من اجلها الشعب . كلام و (هو الكلام بقروش)؟ وطالب بضرورة العودة للشعب و الارتباط بقضاياه يعني يا جماعة بالعربي كده انتو ما بتعرفوا الشغل وحقوا الحكومة دي نحلها ونكون واحده غيرها وتعينوني رئيس وزراء ! مُش ده معني كلام (مستر) عرمان يا جماعة ؟ طالما ان الرجل غير راضي عن اداء كامل الحكومة كده (حته واحده)

أهااا نجي للكلام الما ياهو عرمان قال ان فلول النظام السابق عملوا على (تخريب) الفترة الانتقالية وقال ان هناك محاولة جرت فى يونيو الماضي والحق يُقال الزول ما قال انقلاب قال تخريب لا ومش كده وبس بل بتمويل خارجي كمان وفشلت ! طيب يا جماعة نمسكا واحده واحده اوول حاجة كلمة الفلول دي جابوها من مصر معفية الضرائب تيمناً بنصر الرئيس السيسي (قدس الله سره) و دي انا شايف ما مشكلة خليها زيها زي (القطيع) لافه فى السوق . بعدين محاولة التخريب دي تقولوها كده ساااكت وفشلت وخلاس ما لازم تكون فيها قرائن وقبضتو منو والتمويل الخارجي ده من وين واللا شنو يا جماعة ؟ مش لازم الشعب يعرف من هم الفلول اولاد (اللزينا) ديل عشان يعمل حسابه كمان و اللا الموضوع زي محاولة اغتيال حمدوك وناس ال (اف بي آي) و حاجات من (هذا الذي منه) . اللسه ماعارفين نتيجتها شنو .

ونعود لنقول ما أسهل اطلاق الكلام على عواهنه ولكن عند التثبت قد يصعب اظهار الحقيقة ونظرية المؤامرة التى حاولت (قحت) تسويقها ابان حراك الثلاثين من يونيو الماضي لم يكن موفقاً فالداني والقاصي يعلم ان من دعا للخروج هم لجان المقاومة والشيوعيين ولجان الاحياء واهل الشرق ولم يكن الاسلاميون ومن يملك دلائل عن هذه المؤامرة المزعومة والدعم الخارجي فالصدق والوطنية والامانة تحتم عليه ان يملكها للشعب بدلاً من ان تترك هكذا (تمومة جرتق) لكل من امسك بمايكرفون قال مؤامرة الثلاثين من يونيو !

قبل ما أنسي : ــــ
يا سادة يا كرام الطمعان ليهو فى كرسي واللا حاجة فى نفسو يكوسا بعيد من الكيزان يا جماعة الناس ديل خلاس فاتوا والشعب السوداني كله مقتنع لكن الطريقة التقنع الديك شنو . فأتركوا الاسلاميين ما تركوكم)…

The post العيكورة يكتب: طوااالي كده يا عرمان؟ appeared first on الانتباهة أون لاين.

source https://alintibaha.net/online/84119/