صبري العيكورة يكتب: جهاز بالصين لكشف (الكوزنة)
الانتباهة اون لاين موقع اخباري شامل
بقلم/ صبري محمد علي (العيكورة)
الايام الماضية وتحديداً من قبل اطلاق (مبادرة) حمدوك وما سبقها من (رواية) ان والي القضارف (طلع كوز) ثم بدأ النشطاء فى فرز اعضاء المبادرة الذين ناهزوا السبعين شخصاً ايهم تحوم حوله شبهة (الكوزنة) واشاروا لبعض الاسماء ثم اعقبتها (مذبحة) الجزيرة الشهيرة التى طالت (١٨) من كفاءات جامعة الجزيرة ومشروع الجزيرة وجامعة القرآن الكريم وكلهم لم تجد لجنة ازالة التمكين شيئأ تقوله للرأي العام سوي (والله يا جماعة معليش الجماعة دي طلعوا كيزان) ! آخر هذه الجهجهة ما حدث قبل يومين تقريباً مع مدير الموانئ البحرية الذى تم تعيينه واعفاءه قبل ان يتسلم مهام عمله لانه (طلع كوز) ! اهااا يا جماعة بدل الخليع ده وكوز ما كوز ما تدققوا كويس بدل الفضايح دي وحسب ما حكي لى احد الظرفاء ان الصينيين قد اخترعوا جهازاً حديثاً لكشف (الكوزنة) آآي ما تستغرب ما العلم اطوًر وكده و يلزم مكتب رئيس الوزراء ان يسارع باستيراده حتى يوفر على نفسه هذه (البهدلة) التى يعيشها وستساعده قطعاً فى ان تكون قراراته مبرأة من كل (كوز) و (كوزة) ونرتاح من حكاية (اممك طلع كوز) .
قال ليك الجهاز ده زي بتاع الرنين الميغناطيسي و الاشعة المقطعية البسموه (الام. آر . آي)
أهاا برقدوا ليك الزول المرشح للوظيفة جواهُ . والكويس فى الجهاز ده انه اسئلته مش كتيرة فبعد ان تعمل ليهو (ريستارت) و (ريفرش) وتختار اللغة . يبدأ فى سؤال المرشح . الاسم . العُمر . طوااالى بطلع بيهو للانتماء وكده . فقال ليك فى عدد من الناس من الساهل ان يصنفوا بأنهم كيزان فبعد الاسم والعمر تبدأ الاسئلة اتوماتيكياً طبعاً (مااا تقانة وكده)
ما هو انتماؤك؟
الحركة الاسلامية (يولع نور احمر)
من شيخك ؟
حسن البنا او حسن الترابي او مش عارف سيد قطب (طواالى) لون احمر بذبذات عالية
من رئيسك ؟
الرئيس البشير ويتبعها ب (فك الله اسره واخوانه) … لون أحمر وصفارة
ما رأيكم فى حكومة الفترة الانتقالية وحمدوك؟
قال ليك من المرشح يجمع كرعيه ويبدأ فى الكلام (الما ياهو) طوالى الجهاز يفصل ويطلق صافرة وتضئ كل اللمبات باللون الاحمر الغاني وتظهر ليك فى الشاشة جملة (انتهت الجلسة) وغير لائق .
أها زي ده الباب الدخل بيه يمرقو طواالي لانه كوز كامل الدسم وفرز اول كمان .
اهااا قال ليك فى نوع تاني من المرشحين بجهجه ليك الجهاز ده جهجهه شديده خلاس من يبدأ الاسئلة
ما هو انتماؤك؟
يقول ليه هو الاسلام وفى كل اجزائه لنا وطن ! قال ليك الجهاز ياخد ليهو (صنّة) ويولع لون اصفر
من شيخك ؟
يقول ليهو محمد رسول الله والذين معه اشداء على الكفار رحماء بينهم ! قال ليك الجهاز بتجيهو رجفة ويقرررب يطفي
من رئيسك ؟
يقول ليهو وما محمد الا رسول قد خلت من قبله الرسل ! قال ليك الجهاز يرسل وبتردد متسارع ذبذبات اللون الاصفر
ما رأيكم فى حكومة الفترة الانتقالية ورئيسها حمدوك ؟
يقول ليهو يا ايها الملأ افتوني فى امري ما كنت قاطعة امراً حتى تشهدون وان الملوك اذا دخلوا قرية افسدوها وجعلوا اعزة اهلها اذلة وكذلك يفعلون ! و مش عارف كلمتين تلاتة عن المعارضة الإيجابية وكده
أهااا هنا قال ليك الجهاز يفصل و يشغل نفسه ذاتياً وتظهر فى الشاشة جملة (عفواً تم انهاء المقابلة بناء على طلبكم فضلاً اعد المحاولة لاحقاً) وتنطلق منه صفافير (بيب بيب بيب) .
أها زي ده ياهو زي (اخونا) بتاع المواني وياهو البجهجه ناس حمدوك و بجنن عبد القادر . فلا صنفه الجهاز كوز ولا نص كوز . فيا جماعة نوع الجهاز ده مهم جداً لمكتب رئيس الوزراء والعجب لو كان تحت ادارة الوزير (سلك) .
ياخي استحوا و بطلوا الرجفة والجري بلا كوابح البتسوا فيهو ده فالوطن لا يهمه الانتماء السياسي بقدر حاجته للكفاءات ! فلا يعقل لو ان احدكم عثر فى شراك نعله لقال الكيزان !
قبل ما انسي : ــــ
تذكروا أيها (القحاطة) ان الاسلاميين قالوها فى غير ما مرة انهم غير معنيون بالفترة الانتقالية برمتها ولديهم ما يشغلهم فأتركوا (الكيزان) ما تركوكم . و من يظل خارج دائرة الحدث هو من سيرسم الصورة بكل زواياها و تفاصيلها الدقيقة (فهمتوا يا عمك) .
The post صبري العيكورة يكتب: جهاز بالصين لكشف (الكوزنة) appeared first on الانتباهة أون لاين.
source https://alintibaha.net/online/87570/
تعليقات